شو وقفت عليي؟… ايه وقفت عليك

• “مشينا ولو”
• لأ ما رح مشيك…
• “شو وقفت عليي؟”
• ايه وقفت عليك…
• ما شوفي البلد كيف كلو ماشي غلط بغلط…
• واذا كان، انا ما بدي غذيه للغلط بدي صلح ومش لازم الغلط يستمر….

 نعم هذه التعابير نسمعها يومياً، “شو وقفت على انتخابات ملكة الجمال؟”  شو وقفت على هل اميين  المدعيين لي عم يشتغلو بالاعلام فارضين حالون ع الساحة ومصدقين حالون انون صحافيين؟ … شو وقفت على كل واحد او وحدة مثل فيلم او مسلسل فاشل صار بيعتبر حاله نجم او نجمة بالوقت أهم ممثلين قاعدين بي بيوتون ناطرين اتصال من منتج من كتر البخار الطالع من راسه ما عم يقشع منيح؟ … شو وقفت على كل واحد حمل كاميرا صار بيسمي حاله مخرج… ؟ شو وقفت على  هالموظف لي بالكاد بيعرف يلقط آلة الحاسبة    calculatrice صار أهم موظف بالمصرف وما بيتحاكى…؟ شو وقفت ع كم طبيب سببّ اهماله لوفاة او عطب انسان وبالآخر بيطلع بريء…؟ شو وقفت على كم سياسي سرقو البلد  وبيطلعو بالآخر أبطال…؟ شو وقفت على تجار البنايات لي عم بيعمرو ناطحات سحاب وما بتسكنها الا الاشباح لان أصحابها من بلاد البترول والمواطن اللبناني بالكاد قادر يدفع أجار بيته…؟ شو وقفت على هالكم أزعر اذا حدا دوبل عنه بالسيارة بيلحقو حتى يقتلو متل كأنه عم يقتل برغشة وبينفض بريشه…؟ شو وقفت على هل كم بلا أخلاق لي بيكب كيس زبالة من الشباك كيف ما كان وبحجة الزبالة وين ما كان…؟ شو  وقفت عليي؟

ايه وقفت عليك، لازم كل واحد يبلش من حاله اذا بدو التغيير. وما ينطر الدولة،  ما الدولة اصلا غايبة عن السمع… ما الدولة مش موجودة…الدولة ما الها علاقة باخلاقنا.. الدولة ما بتقلنا كون مجرم او حرامي او بلا اخلاق…

من هنا ما حدا يقلنا مين انتو حتى تحاسبو… نحنا المواطنين وكل واحد من مكانته، بدنا نرفع صوتنا وبدنا ندل على الغلط وما بدنا نسمح ان يمر وكأننا غنم عم ينضحك علينا.

يعني اذا كان لا بد أن تنتخب ملكة جمال لبنان حتى تمثل لبنان، يعني يجب أن تكون أجمل فتاة لبنانية، حتى تمثل فتيات لبنان والا بلاها هالروحة.

يعني اذا كان لازم يكون في عنا إعمار وبنايات للسكن يجب أن تكون صالحة وضمن امكانيات المواطن اللبناني وليس المواطن الخليجي لان اللبنانيين هني لي بدون يسكنو بلبنان مش غير حدن، والا فلتتوقف هذه المشاريع…

يعني اذا كان لا بد أن يكون لدينا مستشفيات وأطباء يجب أن يكون الطبيب ليعالج المريض وليس العكس أن يسبب له بمشاكل أساسا ما كانت واردة تكون عنده. والا فلتقفل المستشفيات…

وبالآخر، ما فيني اسكت ما قول اذا كان لا بد من هالبرامج المذلة على شاشاتنا التي تمثل بلادنا وهي لا تدل الا على الافلاس الثقافي والخيالي… فبلاها هالتلفزيونات ….

واذا كان لا بد من هل كم وحدة نافخة خدودها وشفافها وصار بدها تعمل اعلامية غصبن عن المشاهد… بلاها هالبرامج …. وتروح تشوف شغلة تانية… ترجع عل مطبخ اشرف لها…

نكون او لا نكون…. هذا هو السؤال

الاصلاح يبدأ من المواطن نفسه يجب أن يحاسب نفسه اخلاقياً وضميرياً …

ما حدن يقول أنا ما خصني كلنا خصنا.

سميرة اوشانا